بجلی صارفین کیلئے بڑا ریلیف ختم ہونے والا، اہم خبر آگئی

 

بجلی صارفین کیلئے بڑا ریلیف ختم ہونے کے قریب، اگلے ماہ قیمت بڑھنے کا امکان

 کراچی سمیت ملک بھر کے بجلی صارفین کیلئے بڑا ریلیف ختم ہونے کے قریب پہنچ گیا، بجلی کی قیمت میں ایک روپے 99 پیسے فی یونٹ کمی کی سہ ماہی ایڈجسٹمنٹ کی مدت رواں ماہ ختم ہوجائے گی، جس کے بعد اگلے ماہ سے بجلی مہنگی ہونے کا خدشہ ہے۔

ذرائع کے مطابق اس وقت ملک بھر کے بجلی صارفین کو جنوری تا مارچ 2026 کی سہ ماہی ایڈجسٹمنٹ کی مد میں 67 ارب 17 کروڑ روپے سے زائد کا ریلیف مل رہا ہے۔ تاہم جون 2026 سے جاری اس ایڈجسٹمنٹ کی تین ماہ کی مدت اگست میں ختم ہوجائے گی۔

ذرائع کا کہنا ہے کہ اس ریلیف کی مدت ختم ہونے کے بعد اپریل تا جون 2026 کی سہ ماہی ایڈجسٹمنٹ اگلے ماہ سے لاگو ہونے کا امکان ہے۔

اس حوالے سے بجلی کی تقسیم کار کمپنیوں نے نیپرا میں درخواست جمع کرا دی ہے، جس میں بجلی صارفین پر 23 ارب روپے سے زائد کا اضافی بوجھ منتقل کرنے کی استدعا کی گئی ہے۔ مجوزہ اضافہ تقریباً ایک روپے فی یونٹ بنتا ہے۔