بارہ ربیع الاول کے اجتماعات، وزیراعلیٰ سندھ کی فول پروف سیکیورٹی یقینی بنانے کی ہدایت

  وزیراعلیٰ سندھ سید مراد علی شاہ نے 12 ربیع الاول کے موقع پر صوبے بھر میں فول پروف سیکیورٹی، صفائی ستھرائی، ٹریفک مینجمنٹ اور شہری سہولیات کی بلا تعطل فراہمی یقینی بنانے کی ہدایت کردی۔

وزیراعلیٰ سندھ نے ہفتہ کو مختلف مکاتب فکر سے تعلق رکھنے والے ممتاز علما کرام اور اعلیٰ سرکاری افسران کے اجلاس کی صدارت کی، جس میں 12 ربیع الاول کے سلسلے میں ہونے والے میلاد جلوسوں، مذہبی اجتماعات اور دیگر تقریبات کے انتظامات کا تفصیلی جائزہ لیا گیا۔

اجلاس میں سینئر وزیر اطلاعات شرجیل انعام میمن، وزیر بلدیات ناصر شاہ، وزیر داخلہ ضیا الحسن لنجار، وزیر مذہبی امور ریاض شاہ شیرازی، میئر کراچی بیرسٹر مرتضیٰ وہاب، چیف سیکریٹری آصف حیدر شاہ، پرنسپل سیکریٹری وزیراعلیٰ آغا واصف عباس، ایڈیشنل چیف سیکریٹری داخلہ اقبال میمن، سیکریٹری بلدیات وسیم شمشاد، انسپکٹر جنرل پولیس جاوید عالم اوڈھو، کمشنر کراچی سید حسن نقوی، ایڈیشنل آئی جی کراچی آزاد خان، ڈی آئی جی ٹریفک پیر محمد شاہ، واٹر کارپوریشن کے چیف ایگزیکٹو آفیسر احمد علی صدیقی اور سندھ سالڈ ویسٹ مینجمنٹ بورڈ کے مینیجنگ ڈائریکٹر فواد غفار سومرو سمیت دیگر حکام نے شرکت کی۔

اجلاس میں کراچی سمیت صوبے کے مختلف ڈویژنز کے کمشنرز اور ڈی آئی جیز نے ویڈیو لنک کے ذریعے شرکت کی جبکہ کے الیکٹرک اور ایس ایس جی سی کے نمائندگان بھی موجود تھے۔

وزیراعلیٰ سندھ نے متعلقہ اداروں کو ہدایت کی کہ میلاد جلوسوں اور مذہبی اجتماعات کے روٹس پر سیکیورٹی کے جامع انتظامات کیے جائیں اور قانون نافذ کرنے والے ادارے باہمی رابطے کے ساتھ اپنی ذمہ داریاں انجام دیں۔ انہوں نے شہریوں کی سہولت کے لیے ٹریفک مینجمنٹ کا مؤثر پلان تیار کرنے اور جلوسوں کے دوران آمدورفت کو ممکنہ حد تک معمول کے مطابق رکھنے کی بھی ہدایت کی۔

اجلاس میں علما کرام نے سیکیورٹی، صفائی، ٹریفک، نکاسی آب اور دیگر شہری سہولیات سے متعلق تجاویز پیش کیں۔ وزیراعلیٰ نے متعلقہ محکموں کو علما کی جانب سے سامنے آنے والے مسائل کو ترجیحی بنیادوں پر حل کرنے کی ہدایت کی۔

مراد علی شاہ نے 12 ربیع الاول سے قبل اور دوران صوبے بھر میں خصوصی صفائی مہم چلانے کی ہدایت بھی کی۔ انہوں نے جلوسوں کے راستوں، مساجد، امام بارگاہوں، میلاد مقامات اور دیگر عوامی مقامات پر صفائی کے مؤثر انتظامات، سیوریج اور نکاسی آب کے مسائل کے بروقت حل اور خراب سڑکوں کی مرمت یقینی بنانے پر زور دیا۔

وزیراعلیٰ نے بجلی اور گیس کی فراہمی سے متعلق اداروں کو بھی ہدایت کی کہ مذہبی اجتماعات کے دوران بجلی کی بلا تعطل فراہمی کو یقینی بنانے کے لیے ضروری اقدامات کیے جائیں اور کسی بھی ہنگامی صورتحال سے نمٹنے کے لیے متعلقہ ادارے پیشگی رابطہ کاری رکھیں۔

اس موقع پر وزیراعلیٰ سندھ نے مختلف مکاتب فکر کے علما کرام کے کردار کو سراہتے ہوئے کہا کہ مذہبی ہم آہنگی، اتحاد اور رواداری کے فروغ کے لیے علما کا کردار انتہائی اہم ہے۔ انہوں نے ہدایت کی کہ 12 ربیع الاول کی تقریبات مذہبی عقیدت، احترام، امن اور بھائی چارے کے ماحول میں منعقد کرنے کے لیے تمام ضروری اقدامات کیے جائیں۔

واضح رہے کہ پاکستان میٹرولوجیکل ڈیپارٹمنٹ کے قمری حسابات کے مطابق ربیع الاول 1448 ہجری کا آغاز 15 اگست 2026 کو متوقع ہے، جبکہ 12 ربیع الاول کی متوقع تاریخ 26 اگست 2026 بنتی ہے